Man Talyat Malyat | Sandeep Khare | Diwas Ase Ki | Marathi Kavita

Sandeep Khare
(Born: 13 May 1973, Pune, Maharashtra)
Album: Diwas Ase Ki
Music and lyrics: Sandeep Khare
Singer: Shailesh Ranade

मन तळ्यात मळ्यात ..
जाईच्या कळ्यांत ..


मन नाजुकशी मोतीमाळ
तुझ्या नाजुकश्या गळ्यात ..

उरी चाहुलींचे मृगजळ
वाजे पाचोळा उगी तशात ..

इथे वार्‍याला सांगतो गाणी
आणि झुळुक तुझ्या मनात ..

भिडू लागे रात अंगालागी
तुझ्या नखाची कोर नभांत !

माझ्या नयनी नक्षत्र तारा
आणि चांद तुझ्या ....

_  संदीप खरे

Ayushyavar Bolu Kahi | Sandeep Khare | Ayushyavar Bolu Kahi | Marathi Kavita

Sandeep Khare
(Born: 13 May 1973, Pune, Maharashtra)
Album: Ayushyavar Bolu Kahi
Music and lyrics: Sandeep Khare
Singer: Sandeep Khare & Salil Kulkarni

जरा चुकीचे, जरा बरोबर बोलू काही!
चला दोस्तहो आयुष्यावर बोलू काही!


उगाच वळसे शब्दांचे हे देत रहा तू
भिडले नाहीत डोळे तोवर बोलू काही

तुफान पाहुन तीरावर कुजबुजल्या होड्या
पाठ फिरू दे त्याची नंतर बोलू काही

हवेहवेसे दुःख तुला जर हवेच आहे
नकोनकोसे हळवे कातर बोलू काही

उद्या-उद्याची किती काळजी बघ रांगेतुन
परवा आहे उद्याच नंतर बोलू काही

शब्द असू दे हातामध्ये काठी म्हणुनी
वाट आंधळी प्रवास खडतर बोलू काही

_ संदीप खरे

Ved Lagla Mala Ved Lagla | Sandeep Khare | Ayushyavar Bolu Kahi | Marathi Kavita

Sandeep Khare

(Born: 13 May 1973, Pune, Maharashtra)

Album: Ayushyavar Bolu Kahi

Music and lyrics: Sandeep Khare

Singer: Sandeep Khare

दिसलीस वार्‍यामधे, आपुल्याच तोर्‍यामधे
निळेभोर नभ तुझ्या काळ्याभोर डोळ्यांमधे.. वेड लागलं..

वेड लागलं.. मला वेड लागलं.. मला वेड लागलं..

काळ्याभोर डोळियांनी दावियला इंगा
रणरण माळावर घालतो मी पिंगा
चंद्राळली लाट वर गगनाला भिडे
रोज राती दारातून कवितांचे सडे माझ्या.. वेड लागलं..
वेड लागलं.. मला वेड लागलं.. मला वेड लागलं..

हिरव्याशा पदराचे हलताना पान
कोण नभ कोण धरा झाडा नाही भान
जशी काही पांखराला दिसे दूर वीज
तिला म्हणे ये न माझ्या घरट्यात नीज.. आता वेड लागलं..
वेड लागलं.. मला वेड लागलं.. मला वेड लागलं..

पुनवेची रात अशी येताना भरात
घालतो मी हाक आता रिकाम्या घरात
पाहतो मी, बोलतो मी, चालतो मी असा
वार्‍यावर उमटतो अलगद ठसा.. आता वेड लागलं..
वेड लागलं.. मला वेड लागलं.. मला वेड लागलं..

खुळावले घर-दार, खुळावला वंश
मीच केले जागोजाग देहावर दंश
उसळली आग अशी झणाणली काया
जीव असा खुळा त्या विषाचीच माया.. आता वेड लागलं..
वेड लागलं.. मला वेड लागलं.. मला वेड लागलं..

मला ठावं वेड तुझे विनाशाची हाक
डोळ्यांतून दिसू लागे वेडसर झाक
नका लागू नादी सारी उफराटी त‍र्‍हा
शहाण्याच्या समाधीला शेवटचा चीरा.. आता वेड लागलं..
वेड लागलं.. मला वेड लागलं.. मला वेड लागलं..

_ संदीप खरे

Atasha Me Fakta Rakane | Sandeep Khare | Namanjoor | Marathi Kavita

Sandeep Khare

(Born: 13 May 1973, Pune, Maharashtra)

Album: Namanjoor

Music and lyrics: Sandeep Khare

Singer: Salil Kulkarni

आताशा मी फक्त रकाने दिवसांचे भरतो
चाकोरीचे खरडून कागद सहीस पाठवतो


व्याप नको मज कुठलाही अन्‌ ताप नको आहे
उत्तर कुठले मुळात मजला प्रश्‍न नको आहे
या प्रश्‍नांशी अवघ्या परवा करार मी केला
मी न छळावे त्यांना, त्यांनी छळू नये मजला
बधिरतेच्या पुंगीवर मी नागोबा डुलतो

आता आता छाती केवळ भीती साठवते
डोंगर बघता उंची नाही, खोली आठवते
आता कुठल्या दिलखुश गप्पा उदार गगनाशी
आता नाही रात्रही उरली पुरवीगत हौशी
बिलंदरीने कलंदरीची गीते मी रचतो

कळून येता जगण्याची या इवलीशी त्रिज्या
उडून जाती अत्तरापरी जगण्याच्या मौजा
दारी नाही फिरकत कुठला नवा छंद-चाळा
राखण करीत बसतो येथे सदैव कंटाळा
कंटाळ्याचा देखील आता कंटाळा येतो

_ संदीप खरे

Aatasha Ase He Mala Kaay Hote | Sandeep Khare | Ayushyavar Bolu Kahi | Marathi Kavita

Sandeep Khare

(Born: 13 May 1973, Pune, Maharashtra)

Album: Ayushyavar Bolu Kahi

Music and lyrics: Sandeep Khare

Singer: Salil Kulkarni

अताशा असे हे मला काय होते?
कुण्या काळचे पाणी डोळ्यांत येते

बरा बोलता बोलता स्तब्ध होतो
कशी शांतता शून्य शब्दांत येते

कधी दाटू येता पसारा घनांचा
कसा सावळा रंग होतो मनाचा
असे हालते आत हळुवार काही
जसा स्पर्श पाण्यावरी चांदण्याचा

असा ऐकू येतो क्षणांचा इशारा
क्षणी व्यर्थ होतो दिशांचा पसारा
नभातून ज्या रोज जातो बुडोनी
नभाशीच त्या मागू जातो किनारा

न अंदाज कुठले, न अवधान काही
कुठे जायचे, यायचे, भान नाही
जसा गंध निघतो हवेच्या प्रवासा
न कुठले नकाशे, न अनुमान काही

कशी ही अवस्था कुणाला कळावे?
कुणाला पुसावे? कुणी उत्तरावे?
किती खोल जातो तरी तोल जातो
असा तोल जाता कुणी सावरावे?

_ संदीप खरे

Sarivar Sar | Sandeep Khare | Diwas Ase Ki | Marathi Kavita

Sandeep Khare

(Born: 13 May 1973, Pune, Maharashtra)

Album: Diwas Ase Ki

Music and lyrics: Sandeep Khare

Singer: Sandeep Khare

दूरदूर नभपार डोंगराच्या माथ्यावर
निळेनिळे गारगार पावसाचे घरदार
सरीवर सर .... सरीवर सर ....


तडातडा गार गारा गरागरा फिरे वारा
मेघियाच्या ओंजळीत वीज थिजलेला पारा
दूरवर रानभर नाचणारा निळा मोर
मोरपिस मखमल ! उतू गेले मनभर !
सरीवर सर .... सरीवर सर ....

थेंब थेंब मोती ओला थरारत्या तनावर
शहार्‍याचे रान आले एका एका पानावर
ओल्या ओल्या मातीतुन वीजवेडी मेघधून
फिटताना ओले उन्ह झाले पुन्हा नवथर
सरीवर सर .... सरीवर सर ....

उधळत गात गात पाय पुन्हा परसात
माती मऊ काळी साय, हुळहुळ पावलांत
असे नभ झरताना घरदार भरताना
आले जल .... गेले जल .... झाले जल आरपार
सरीवर सर .... सरीवर सर ....

अशा पावसात सये व्हावे तुझे येणे-जाणे
उमलते ओले रान, रान नव्हे मन तुझे
जशी ओली हुरहुर थरारते रानभर
तसे नाव तरारावे माझे - तुझ्या मनभर !
सरीवर सर .... सरीवर सर ....

_ संदीप खरे

He Bhalte Avaghad Aste | Sandeep Khare | Ayushyavar Bolu Kahi | Marathi Kavita

Sandeep Khare

(Born: 13 May 1973, Pune, Maharashtra)

Album: Ayushyavar Bolu Kahi

Music and lyrics: Sandeep Khare

Singer: Sandeep Khare & Salil Kulkarni

गाडी सुटली, रूमाल हलले, क्षणांत डोळे टचकन ओले
गाडी सुटली, पडले चेहरे, क्षण साधाया हसरे झाले


गाडी सुटली हातामधुनी हात कापरा तरी सुटेना
अंतरातली ओली माया तुटू दे म्हंटले तरी तुटेना
का रे इतका लळा लावुनी नंतर मग ही गाडी सुटते
डोळ्यांदेखत सरकत जाते आठवणींचा ठिपका होते

गाडी गेली, फलाटावरी नि:श्वासांचा कचरा झाला
गाडी गेली, डोळ्यांमधल्या निर्धाराचा पारा फुटला

हे भलते अवघड असते
कुणी प्रचंड आवडणारे, ते दूर दूर जाताना
डोळ्यांच्या देखत आणि नाहीसे लांब होताना
डोळ्यांतील अडवून पाणी, हुंदका रोखुनी कंठी
तुम्ही केविलवाणे हसता अन्‌ तुम्हास नियती हसते
हे भलते अवघड असते

तरी असतो पकडायाचा हातात रूमाल गुलाबी
वार्‍यावर फडकवताना पाह्यची चालती गाडी
ती खिडकितून बघणारी अन्‌ स्वत:मधे रमलेली
गजरा माळावा इतुके ती सहज अलविदा म्हणते
हे भलते अवघड असते

तुम्ही म्हणता मनास आता, हा तोडायाचा सेतू
इतक्यात म्हणे ती "माझ्या कधी गावा येशील का तू?"
ती सहजच म्हणुनी जाते मग सहजच हळवी होते
गजर्‍यातील दोन कळ्या अन् हलकेच ओंजळीत देते‌
हे भलते अवघड असते

कळते की गेली वेळ न आता सुटणे गाठ
आपुल्याच मनातील स्वप्‍ने घेऊन मिटावी मूठ
ही मूठ उघडण्यापूर्वी चल निघुया पाऊल म्हणते
पण पाऊल निघण्यापूर्वी गाडीच अचानक निघते
हे भलते अवघड असते

परतीच्या वाटेवरती गुदमरून जड पायांनी
ओठांवर शीळ दिवाणी बेफिकीर पण थरथरती
पण क्षणक्षण वाढत असते अंतर हे तुमच्या मधले
मित्रांशी हसतानाही हे दु:ख चरचरत असते
हे भलते अवघड असते

_ संदीप खरे

Ajun Tari Rool Sodun | Sandeep Khare | Namanjoor | Marathi Kavita

Sandeep Khare

(Born: 13 May 1973, Pune, Maharashtra)

Album: Namanjoor

Music and lyrics: Sandeep Khare

Singer: Sandeep Khare & Salil Kulkarni

अजून तरी रूळ सोडून सुटला नाही डब्बा
आणि अजून तरी नाही अमच्या चारित्र्यावर धब्बा


आमच्या देखिल मनी आले चांदण्याचे पूर
आम्हांलाही दिसल्या शम्मा अन् शम्मेचे नूर
अजून तरी परवाना हा शम्मेपासून दूर
मैत्रिणीच्या लग्‍ना गेलो घालून काळा झब्बा

कुणी नजरेचा ताणून नेम केलेले जखमी
कुणी ओठांची नाजुक अस्त्रे वापरली हुकुमी
अन्‌ शब्दांचे जाम भरोनी पाजियले कोणी
मैखान्यातही स्मरले आम्हां मंदिर-मस्जिद-काबा

कधी गोडीने गाऊन गेलो जोडीने गाणी
रमलो ही जरी विसरून सारे आम्ही खुळ्यावाणी
सर्वस्वाची घेऊन दाने आले जरी कोणी
अजून तरी सुटला नाही हातावरला ताबा

कोण जाणे कोण मजला रोखून हे धरते
वाटा देती हाका तरी पाऊल अडखळते
कुठल्या शपथेसाठी माझी ओंजळ थरथरते
मोहाहुनही मोहक माझी हुरहुरण्याची शोभा

_ संदीप खरे