Kashi tujh samajau sang | B B Borkar | Marathi Kavita

Balakrishna Bhagwant Borkar
(Born: 30 November 1910, Died: 8 July 1984)

कशि तुज समजावु सांग?
का भामिनि उगिच राग?

हास्याहुनि मधु रुसवा
हेमंती उष्ण हवा
संध्येचा साज नवा
हा का प्रणयानुराग?

चाफेकळि केवि फुले?
ओष्ठ-कमल जेवि उले?
भोवति मधुगंध पळे
का प्रसन्‍न वदन-राग?

वृत्तींचा होम अमुप
त्यात जाळु गे विकल्प
होउनिया निर्विकल्प
अक्षय करु यज्ञयाग

ओठांचे फेड बंध
गाइ गडे मुक्त छंद
श्वासांचे करू प्रबंध
हृदयांचे मधु प्रयाग

__ बा. भ. बोरकर

Chepen Chepen | Sandeep Khare | Ayushyavar Bolu Kahi | Marathi Kavita

Sandeep Khare

(Born: 13 May 1973, Pune, Maharashtra)

Album: Ayushyavar Bolu Kahi

Music and lyrics: Sandeep Khare

Singer: Sandeep Khare & Salil Kulkarni

साहेब म्हणतो चेपेन चेपेन, पोलिस म्हणतो चेपेन चेपेन
काळ मोठा वेळ खोटी, जन्मच म्हणतो चेपेन चेपेन


जगणे झाले अचके देता नाकापाशी धरतो सूत
गचके खाऊन मेली स्वप्‍ने त्या स्वप्‍नांचे झाले भूत
भूत म्हणाले झाडाला अस्तित्वाच्या फांद्यांना
सुटका नाही दिवस-रात्र घरात-दारात भेटेन भेटेन

दिवस रोजचा थापा मारत दारावरती देतो थाप
'दोरी दोरी' म्हणता म्हणता त्या इच्छांचे झाले साप
धरता हाती डसती रे सोडून देता पळती रे
मन म्हणते पकडीन पकडीन, हात म्हणतो सोडेन सोडेन

मी बुद्धाला मारून डोळा भरतो माझा पेला रे
प्याला तो ही गेला जो ना प्याला, तोही गेला रे
या जगण्याला फुटता घाम छलकत जातो माझा जाम
अर्थ म्हणतो 'दारू दारू', शब्द म्हणतो 'शँपेन शँपेन'

पानावरती कितीक मजकूर शब्द नव्हे ती किटकिट रे
या जगण्याचे झाले आहे पत्त्यावाचून पाकीट रे
हसलो मी जरी रडलो मी इथे येउनी पडलो मी
जन्म बोंबले 'सांगा सांगा', मृत्य़ू म्हणतो 'सांगेन सांगेन'

_  संदीप खरे [by Sandeep Khare]

Ti yete anik jaate | Arati Prabhu [Chintamani Khanolkar] | Marathi Kavita | Movie Lyrics

ती येते आणिक जाते | Ti yete anik jaateAarati Prabhu

ती येते आणिक जाते
येताना कधी कळ्या आणिते
अन जाताना फुले मागते


येणे-जाणे, देणे-घेणे
असते गाणे जे न कधी ती म्हणते

येताना कधी अशी लाजते
तर जाताना ती लाजविते
कळते काही उगीच तीहि
नकळत पाही काहीबाही
अर्थावाचून उगीच नाही नाही म्हणते

येतानाच कसली रीत
गुणगुणते ती संध्यागीत
जाताना कधी फिरून येत
जाण्यासाठीच दुरून येत
विचित्र येते विरून जाते जी सलते

_ आरती प्रभू



Chintamani Tryambak Khanolkar
(8 March 1930 – 26 April 1976)
He writes all poems under name 'Arati Prabhu'.

गाऊ त्यांना आरती (Gau tyana aarati By Yashawant)

संगरी वीराग्रणी
जे धैर्यमेरू संकटी,
जन्मले या भारती
राष्ट्रचक्रोद्धारणी
कर्णापरी ज्यांना मृती,
गाऊ त्यांना आरती

कोंदला अंधार मार्गी
खाचखड्डे मातले,
तस्करांनी वेढिले
संभ्रमी त्या जाहले
कृष्णापरी जे सारथी,
गाऊ त्यांना आरती

स्वार्थहेतूला दिला
संक्षेप ज्यांनी जीविती,
तो परार्थी पाहती
आप्‍तविस्तारांत ज्यांच्या
देशही सामावती,
गाऊ त्यांना आरती

देश ज्यांचा देव,
त्याचे दास्य ज्यांचा धर्म हो
दास्यमुक्ति ध्येय हो
आणि मार्कंडेयसे जे
जिंकिती काळाप्रती,
गाऊ त्यांना आरती

देह जावो, देह राहो,
नाहि ज्यांना तत्क्षिती,
लोकसेवा दे रती
आणि सौभद्रापरी
देतात जे आत्माहुती,
गाऊ त्यांना आरती

जाहल्या दिंमूढ लोकां
अर्पिती जे लोचने,
क्षाळुनी त्यांची मने
कोटिदीपज्योतिशा
ज्यांच्या कृती
ज्यांच्या स्मृती,
गाऊ त्यांना आरती

नेटके काही घडेना,
काय हेतु जीवना,
या विचारी मन्मना
बोधितो की
'एवढी होवो तरी रे सत्कृति,
गा तयांची आरती.'

_ यशवंत दिनकर पेंढरकर

नीज नीज माझ्या बाळा (neej neej majhya baala by Yashawant)

नीज नीज माझ्या बाळा,
करू नको चिंता
काळजी जगाची साऱ्या
आहे भगवंता!

अंगावर पांघरूण
ओढुनिया काळे
देवाजीच्या मांडीवर
ब्रह्मांड झोपले
लाख चांदण्यांचे
डोळे उघडे ठेवून
पिता तो जगाचा
बैसे जागत अजून

ज्याने मांडियला सारा
विश्वाचा हा खेळ
तोच चालवील त्याला,
तोच सांभाळील
झोपली पाखरे रानी,
झोपली वासरे
घरोघरी झोपी गेली
आईची लेकरे
नको जागू,
झोप आता,
पुरे झाली चिंता
काळजी जगाची साऱ्या
आहे भगवंता!

_ यशवंत दिनकर पेंढरकर

Ek Dhaga Sukhacha | Jagachya Pathivar | Marathi Song Lyrics

Ek Dhaga Sukhacha | Marathi Song Lyrics

एक धागा सुखाचा, शंभर धागे दुःखाचे
जरतारी हे वस्त्र माणसा तुझिया आयुष्याचे

पांघरसी जरि असला कपडा
येसी उघडा जासी उघडा
कपड्यासाठी करिसी नाटक तीन प्रवेशांचे

मुकी अंगडी बालपणाची
रंगित वसने तारुण्याची
जीर्ण शाल मग उरे शेवटी लेणे वार्धक्याचे

या वस्त्राते विणतो कोण
एकसारखी नसती दोन
कुणा न दिसले त्रिखंडात त्या हात विणकऱ्याचे
__ग. दि. माडगूळकर

Ek dhaga sukhach, shambhar dhage dukhache
Jaratari he vastra manasa tujhiya aayushyache

Pangharasi jari asala kapada
yesi ughada jasi ughada
Kapadyasathi karisi natak tin praveshanche

Muki angadi balapanachi
Rangit vasane tarunyachi
Jirna shal mag ure shevati lene vardhakyache

Ya vastrate vinato kon
Eksarakhi nasati don
Kuna na disale trikhandat tya hat vikanaryache
_G. D. Madgulkar

त्या व्याकुळ संध्यासमयी (Tya wyakul sandhya samayi by Grace)

त्या व्याकुळ संध्यासमयी
शब्दांचा जीव वितळतो,
डोळ्यांत कुणाच्या क्षितिजे
मी अपुले हात उजळतो

तू आठवणींतुन माझ्या
कधी रंगीत वाट पसरशी,
अंधार-व्रताची समई
कधी असते माझ्यापाशी

पदराला बांधुन स्वप्‍ने
तू एकट संध्यासमयी,
तुकयाच्या हातांमधला
मी अभंग उचलुन घेई

तू मला कुशीला घ्यावे
अंधार हळू ढवळावा,
संन्यस्त सुखाच्या काठी
वळिवाचा पाऊस यावा
_ ग्रेस